Muqdisho: (Sh. M. Network) Gudoomiyaha barlamanka KMG Soomaaliya Madoobe Nuunoow Max'ed ayaa caawa waraysiga ugu horeeyay kadib doorashadiisa waxaa uu siiyay Idaacadda Shabelle ee Magaalada Muqdisho, isagoo ka hadlay waxyaabo badan oo quseeya dalka iyo barlamanka KMG Soomaaliya.

Madoobe Nuunoow Max'ed, gudoomiyaha barlamanka ayaa waxaa uu sgheegay in qorshahiisu uu yahay in ugu horeyn Umadda laga saaro jawhareerka iminka ay ku jirto islamarkaana barlamanka sharciga uu noqdo, waxaana uu tilmaamay inay doonayaan in is badalo badan oo dhinaca barlamanka Soomaaliya.

Gudoomiyaha ayaa waxaa uu sheegay inaysan uusan u baahneyn in barlamanka uu noqdo kuwii ka hareeyay oo soo maray dalka islamarkaana Xildhibaanada ay dhex galayaan shacaka iyo deegaanada ay kasoo kala jeedaan si ay isula jaan qaadaan shacabka, wuxuuna tilmaamay in wax waliba lagu hogaamin doono sharciga barlamanka sida uu hadalka u dhigay, isagoo xusay in si deg deg ah Wufuud ay u kala diri doonaan barlamanada IGAD iyo International Community.

“Shariif Xasan Sheekh Aadan anagaa dooranay, waliba si xamaasad leh ayaan ku dooranay, waxaan marka hore ka codsanayaa, in isna waqtigiisa uu ajiibo, waayo barlamanka ayaa doortay, hadana barlamanka ayaa xilkii ka qaaday, marka sidaasi daraadeed waxaan filayaa in isaga waqtigiisa uu ogalaan doono in uu ka mid ahaan doono xubnihii kale ee barlamanka, waxaan filayaa in taageero buuxda uu siin doono wixii maanta dhacay” intaasi waxaa hadalkiisa raaciyay gudoomiyaha barlamanka.

Ugu dambeyn gudoomiyaha barlamanka ayaa waxaa uu u balan qaaday shacabka Soomaaliyeed in barlamanka KMG Soomaaliya uu ku hogaamin doono sharciga islamarkaana ay dhici doonin cid loo kala eexda, wuxuuna carabka ku dhuftay in sidoo kale ay la shaqeyn doonaan guud ahaan Hay'adaha dowladda KMG Soomaaliya si dhibaatada looga saaro Umadda Soomaaliyeed.

Addis Ababa: (Sh. M. Network) Madaxda Midowga Africa ayaa waxa ay sheegeen in ay dooonayaan in ay dhigaan Strategyyad cusub oo ay kula dagaalamayaan Xarakada Al Shabaab oo gacanta ku haysa qaar ka tirsan gobolada Koofureed ee dalka Soomaaliya.

Kulanka ayaa waxa uu ka dhacayaa maanta oo Arbaca ah magaalada Adis Ababa ee caasimada dalka Ethiopia waxa ka soo qeyb galayo wasiirada Gaashandhiga ee wadamada geeska Africa iyo quburo ku taqasusay dhanka Militariga.

Madaxa Nabada iyo Amniga ee Midowga Africa Ramaten lamamra oo saxaafadda kula hadlayey magaalada Addis Ababa ayaa waxa uu sheegay in kulankaan looga hadlayo sidii Taatiko Cusub oo lagula dagaalamo AL Shabaab loo dajin lahaa, isagoo hoosta ka xariiqay in Midowga Africa ay ka go'an tahay wax ka qabashada iyo ciribtirka Al Shabaab.

Kulankaan ayaa waxaa ka qeyb galaya wasiirka gaashaandhiga ee wadamada ciidamadooda ku sugan yihiin dalka Soomaaliya, iyadoo Midowga Africa uu ka dalbaday Qaramada Midoobay in la taageero kulankaan.

Ban ki Moon “Waa in la diyaariyo dhaqan galinta qodobadii shirka Garowe iyo diyaarinta dastuur dalku yeesho ayaa aad loogu baahan yahay waana muhiim in dhinacyada Soomaalida deg deg ugu hawl galaan arrintaas”

Xog'hayaha guud ee QM Ban ki Moon ayaa ugu baaqay madaxda Soomaalida inay deg deg u dhaqan galiyaan go'aanadii kasoo baxay shirkii wada tashiga ee dhawaan lagu gabo gabeeyay magaaladda Garoowe ee xarunta u ah maamul goboleedka Puntland.

War saxaafadeed ka soo baxay xafiiska Ban ki Moon ee magaalada New York oo uu saxaafadda u akhriyay afhayeenkiisa ayaa waxaa uu ku sheegay in xog'hayuhu soo dhaweynayo qodobadii shirkii Garoowe waxaana uu intaa ku daray in loogu baaqayo in dhinacyadii saxiixay hishiiskaasi ay deg deg u dar dar galiyaan si looga baxo waqtiga ku meel gaarka loona gudbo dawlad dhexe oo wadanku yeeshu.

“In la diyaariyo dhaqan galinta qodobadii shirka kasoo baxay iyo diyaarinta dastuur dalku yeesho ayaa aad loogu baahanyahay waana muhiim in dhinacyada Soomaalida deg deg ugu hawl galaan arrintaas” ayaa lagu yiri war saxaafadeedka Ban ki Moon ka soo baxay.

Ban ki Moon waxaa uu xusay in qorshaha tubta nabadda Soomaaliya ee Road Map, ka iuu xal u yahay dhibaatadda Soomaaliya ka jirta iyo in laga gudbo ku meel gaar waxaana uu sidoo kale tilmaamay in Q,M ay sii wadayso taageeradda ay siiso dawlada Soomaaliya si nabad loogu helo gudaha Soomaaliya.

Dawlada KMG, iyo m/mulada GALMUDUG iyo Puntland ayaa dhawaan shirkii magaalada Garoowe ka dhacay ku sheegeen in go'aanadii shirkii Garoowe kla soo baxay ay ka mid ahaayeen in la dhimo tirada xildhibaanadda KMG laguna qeybsado hanaanka 4.5 oo ay dawladu haatan ku dhisan tahay.   

Dowladda Federalka KMG ee Soomaaliya ayaa maanta ku dhawaaqday inuu bilowday “Howlgalka soo celinta Nabadda iyo Xasiloonida Soomaaliya” iyadoo lala kaashanayo saacidaada beesha caalamka iyo waddamada deriska ah.

“Maanta, shacabka iyo Dowladda Soomaaliya waxey u istaageen la dagaalanka kooxaha sheydaamiinta ee Al-Qaeda iyo Al-Shabaab oo in muddo ah ku hayey argagaxisnimo iyo dil ay u geysteen Soomaali fara badan. Shacabkayagu in muddo ah bey kala kulmayeen silc iyo dhibaato kaga imaneysey kooxaha Al-Shabaab. Maanta waxaan bilownay howlgalladii shacabka Soomaaliyeed looga xorreynayey gumeysiga kooxaha argagaxisada ee Al-Shabaab.” Sidaas waxaa yiri Ra'iisul Wasaaraha Soomaaliya Dr Abdiweli Mohamed Ali.

Shacabka Soomaaliyeed dhibaatooyin fara badan baa ka soo gaaray ku hoos noolaashada kooxaha xag-jirka ah oo in muddo ah si waxushnimo ah ula dhaqmayey shacabka. Al-Shabaab waxey ka mid yihiin golaha argagaxisada caalamiga ah ee uu hoggaamiyo kooxda Al-Qaeda.

“Howlgalkan soo celinta Nabadda iyo Xasiloonida Soomaaliya waxuu u socdaa si wanaagsan oo qorsheysan. Saakay, Ciidanka Xooga Dalka Soomaaliyeed waxey goobo muhiim ah ka qabsadeen kooxihii Al-Shabaab ka dib dagaal ku dhexmaray gobolka Hiiraan. Waxaan si rasmi ah u codsaneynaa kaalmada iyo is-garab istaaga beesha caalamka guud ahaan iyo dowladaha deriska ah sida Ethiopia si loo saacido shacabka iyo Dowladda Soomaaliyeed laguna saacido howlgalkan taariikhiga ah.“ Sidaas waxaa yiri Ra'iisul Wasaaraha Soomaaliya Dr Abdiweli Mohamed Ali.

Ujeedada howlgalkan ayaa ah in laga xorreeyo shacabka Soomaaliyeed kooxahan arxan laawayaasha ah ee xagjirka ah. Howlgalkan waxuu sii kordhinayaa goobaha nabadda ee Soomaalida si ay u helaan kaalmada ama gurmadka caalamiga ah oo ay si aad ah ugu baahanyihiin.

Dowladda Federalka Soomaaliya waxey si deg deg ah uga dalbaneysaa beesha caalamka iyo hay'adaha gar-gaarka bani'aadanimo inay gar-gaar bani'aadanimo la soo gaaraan goobaha laga xorreeyo kooxaha Al-Shabaab.